Од ова раководство на ВМРО-ДПМНЕ никој од Стево Пендаровски не барал ништо, истакна потпретседателот и пратеник на ВМРО-ДПМНЕ, Александар Николоски, на денешната прес-конференција во Собранието.
„За жал, ќе бидам директен малку и безобразен, ама не заслужува ништо поинаку Стево Пендаровски, нема да го кажам ова првпат, Стево Пендаровски се претвори во најголема политичка алапача на македонскава политичка сцена, што целосно ја урива позицијата претседател на државата затоа што дневните активности му содржат или во тек на денот се среќава по неколкупати со Агенцијата за разузнавање, која, за жал, е под него. Озборуваат кој со кого се гледа, пие кафе, живее, не живее, има брачни проблеми, нема брачни проблеми итн., ги пласира кај одредени ваши колеги новинари, најчесто неточни, и на тоа му се сведува денот, како што му се сведува денот и на праќање пораки на едни, други, трети личности, озборувајќи други, трети личности и на врвот на лица што се озборувани се политичари од политичката партија што го поддржа за кандидат за претседател, веројатно, затоа сега нема поддршка“, истакна Николоски.
Тој изјави дека Пендаровски сочно го озборува и претходниот премиер Зоран Заев, кој двапати го поддржа за кандидат за претседател.
„Нели еднаш изгуби од Ѓорге Иванов и актуелниот Димитар Ковачевски со зборови, кои, ќе дозволите да не ги кажам во јавност, затоа што се надвор од пристојно ниво на комуникација. За таква личност се работи, за една фасада, за една празнина која не знае ништо друго, освен да замајува јавност или да озборува, а ако некој побарал од него таква работа, треба да каже кој или да каже дека лаже, а вака да ја замајува јавноста, освен класична алапача, нема друг израз“, вели Николоски.
Макфакс
