112 неправилности при контрола на товарни и моторни возила, најмногу во Тетово

Вкупно 738 товарни и моторни возила биле контролирани во засилена сообраќајна акција спроведена низ целата држава, при што биле утврдени 112 неправилности, соопшти Министерството за внатрешни работи.

Контролата била спроведена на 30 септември, во периодот од 07:00 до 12:00 часот, а била насочена кон товарните возила, како и кон моторните возила кои се вклучуваат во сообраќајот од земјени патишта, градилишта и други површини и притоа оставаат кал на коловозот.

— реклама —

Кај товарните возила биле проверувани неправилности поврзани со претовар, неправилно сместен или необезбеден товар, техничка неисправност, недозволен превоз на лица и други прекршоци.

— реклама —

Од вкупно контролираните возила, 184 биле упатени во станица за технички преглед. Најголем број од 112-те констатирани неправилности биле утврдени на подрачјето на СВР Тетово – 28, потоа СВР Скопје со 23 и СВР Штип со 20, додека останатите неправилности биле констатирани на подрачјата на другите сектори за внатрешни работи.

За утврдените неправилности биле преземени вкупно 112 мерки. Од сообраќај биле исклучени 37 возила, а за 13 случаи биле поднесени барања за поведување прекршочна постапка.

— реклама —

МВР соопшти дека за сите констатирани прекршоци биле преземени соодветни мерки и изречени санкции согласно со законските прописи.

Во текот на акцијата биле регистрирани и 162 прекршоци од друг вид.

Од Министерството најавуваат дека ќе продолжат со засилени сообраќајни контроли со цел зголемување на безбедноста во сообраќајот, спречување неправилности и доследно почитување на сообраќајните правила и прописи.