На денешен ден, пред 116 години, во Скопје е родена Агнеса Гонџа Бојаџиу, позната во целиот свет како Мајка Тереза. Родена е на 26 август 1910 година, на тогашната улица Поп Кочина број 14, на просторот каде што денес се наоѓа плоштадот Македонија.
Гонџа била најмладото дете во семејството. Имала постара сестра Ага и брат Лазар, а потекнувала од добро ситуирано семејство во кое, според сведоштвата за нејзиното детство, особено се негувала грижата за луѓето на кои им била потребна помош.
Уште на 12-годишна возраст, Гонџа почувствувала повик да му го посвети својот живот на Бога. Шест години подоцна го напуштила родното Скопје и заминала кон Даблин, Ирска. Од железничката станица во Скопје, заедно со мајка ѝ Драна и сестра ѝ Ага, отпатувала за Загреб, од каде што продолжила кон Ирска. Тоа била и нејзината последна средба со мајка ѝ и сестра ѝ.
Нејзината животна мисија подоцна ја однела во Индија, каде што започнала долгогодишна работа со сиромашните, болните и најранливите. За својата исклучително широка хуманитарна дејност, во 1979 година ја добила Нобеловата награда за мир.
Мајка Тереза починала на 5 септември 1997 година во Колката, Индија, по повеќегодишни здравствени проблеми поврзани со срцето и белите дробови.
Само две години по нејзината смрт започнала диоцезиската фаза од процесот за нејзината беатификација и канонизација. Папата Јован Павле Втори ја прогласил за блажена на 19 октомври 2003 година, со што ја добила титулата блажена Мајка Тереза.
Процесот продолжил и по беатификацијата. На 17 декември 2015 година, Ватикан потврдил дека папата Франциско го признал и второто чудо што ѝ се припишува, поврзано со оздравувањето на човек од Бразил со повеќе тумори на мозокот.
Мајка Тереза е канонизирана на 4 септември 2016 година на плоштадот „Свети Петар“ во Ватикан, пред десетици илјади верници. Со тоа Агнеса Гонџа Бојаџиу и официјално станала Света Тереза од Калкута, оставајќи зад себе светско наследство на хуманитарна работа и помош за најсиромашните.
