Платформата „12.05 Разговори за иднината“ најавува иницијатива за промени во раководството на СДСМ и окрупнување на опозицијата. Од платформата велат дека по втората трибина ќе му го претстават на претседателот на СДСМ, Венко Филипче, планот за негово повлекување од функцијата.
Игор Ивановски-Шема, Андреј Петров, Емилијан Станковиќ, Славјанка Петровска, Никола Ќурчиев и Гордан Георгиев се меѓу оние што ќе го претстават планот. Тие велат дека паралелно работат и на создавање поширок опозициски фронт, во кој би биле вклучени различни опозициски структури, групации и партии.
Ивановски оцени дека власта има висок рејтинг, но според него тоа не се должи на нејзините постигнувања. Тој ја критикуваше Владата за односот кон криминалот и корупцијата, реформите во правосудството и сервисните политики.
„Целта е да се формира опозициски фронт. Во него може и мора да се најде место за секој опозициски граѓанин, структура, групација, партија, вклучително и СДСМ, но не со ова раководство“, рече Ивановски.
Од платформата нагласуваат дека немаат намера да формираат нова партија, ниту да настапуваат со независни листи на следните парламентарни избори. Наместо тоа, велат дека целта е промена и реформирање на СДСМ и обединување на опозицијата.
Славјанка Петровска порача дека Филипче бил предупредуван за потребата од реформи во партијата. Таа рече дека со него имала неколку средби на оваа тема, но дека договорите, според неа, не биле спроведени.
„Ако СДСМ не се промени, ќе исчезне од политичката сцена. Ваква СДСМ претставува штит на оваа власт. Го трошиме времето на СДСМ, а го купуваме тоа на Христијан Мицкоски“, рече Петровска.
Таа додаде дека инсистирала на отчетност на функционерите од владите на Заев и Ковачевски, како и на ветинг за секој што би претендирал да биде дел од раководството на СДСМ.
Петровска потврди и дека ѝ било понудено да биде дел од актуелното раководство на партијата, но, како што рече, под услов да не ги изнесува јавно своите несогласувања.
Емилијан Станковиќ, пак, рече дека повеќепати разговарал со Филипче и дека тој бил запознаен со нивните намери. Станковиќ оцени дека актуелниот претседател на СДСМ не успеал да ја реформира партијата.
„Имаше две години да ја реформира партијата и ништо не направи. Тој самиот ми рече дека не верува дека ќе ја реформира СДСМ“, рече Станковиќ.
Од платформата инсистираат дека СДСМ треба повторно да се потпира на членството при носењето на клучните одлуки. Според нив, реформата на партијата и создавањето поширок опозициски фронт се неопходни за настап на следните парламентарни избори.
