Четиринаесетгодишно момче се здобило со тешки телесни повреди, а неговиот 12-годишен сопатник е повреден во сообраќајна несреќа што се случила на локалниот пат Штип–село Шашаварлија, соопшти Министерството за внатрешни работи.
Несреќата била пријавена на 12 јули во 13:15 часот, а во неа учествувале патничко возило „фиат“ со штипски регистарски ознаки, управувано од О.В. (50) од Штип, и мопед без регистарски ознаки, кој го управувал 14-годишник од Штип.
Во судирот, 14-годишниот возач на мопедот се здобил со тешки телесни повреди, додека неговиот 12-годишен сопатник се здобил со телесни повреди. Повредите им биле констатирани во Клиничката болница во Штип.
По наредба на јавен обвинител, увид на местото на несреќата извршила увидна екипа на СВР Штип.
