Петнаесетгодишник од Кичево е лишен од слобода откако со мопед удрил во велосипедист, кој при несреќата се здобил со тешки телесни повреди.
Од МВР информираат дека на 18 август во 18:10 часот, на улицата „Влашки пат“ во Кичево, полициски службеници од ОВР Кичево го привеле малолетникот. Претходно, тој управувал мопед со кичевски регистарски ознаки без да има положено соодветен возачки испит.
Во сообраќајката мопедот удрил во велосипед управуван од 68-годишниот А.А. од кичевското село Црвевци. Велосипедистот се здобил со тешки телесни повреди, кои биле констатирани во Општата болница во Кичево.
По целосното документирање на случајот, против малолетникот ќе биде поднесена кривична пријава по член 297-а од Кривичниот законик, за „безобѕирно управување со моторно возило“.
