16 загинати во нападот на трговскиот центар во Украина, се проверува дали продавницата требало да биде евакуирана

Украинската полиција во Дњипропетровската област отвори кривична постапка против директорот на супермаркет во трговскиот центар во Криви Рих, кој беше погоден во руски напад со дронови.

Како што соопшти украинскиот министер за внатрешни работи Иван Вихивски, директорот се истражува поради сомнение за немар, бидејќи продавницата наводно останала отворена и за време на воздушната тревога.

— реклама —

Во рускиот напад загинаа најмалку 16 лица, а повредени беа уште 130, меѓу кои и 23 деца. Спасувачките екипи и натаму трагаат по исчезнати лица.

„Значителен број од загинатите во нападот на трговскиот центар беа пронајдени во супермаркетот“, изјави Вихивски.

— реклама —

Според украинските власти, од моментот кога била вклучена воздушната тревога до првиот удар со дрон поминале околу 20 минути.

Истрагата треба да утврди дали вработените и посетителите биле навреме предупредени за опасноста, дали била издадена наредба за евакуација и дали биле почитувани безбедносните протоколи за објект во регион близу до фронтот.

Ќе се проверуваат и наводите дека вратите на засолништето биле блокирани.

— реклама —

Освен директорот на супермаркетот, полицијата ќе го испитува и постапувањето на одговорни лица во компанијата-сопственик на трговскиот центар, како и на други деловни субјекти кои работат во објектот.

„За време на воздушна тревога клучно е брзо да се реагира за да не се создаваат гужви и за да се заштитат животите“, рече Вихивски.

Тој ги повика управителите на деловни објекти, особено во областите блиску до фронтот и границата, сериозно да ги сфаќаат воздушните закани и навреме да ги применуваат протоколите за заштита на луѓето.

Истрагата треба да покаже дали евентуални пропусти во организацијата на евакуацијата дополнително придонеле за бројот на жртвите.