Во Македонија до 17:30 часот денеска се регистрирани 17 пожари на отворен простор, од кои пет се активни, четири се ставени под контрола, а осум се целосно изгаснати, информира Центарот за управување со кризи.
Активни пожари има во општините Студеничани, Македонски Брод, Велес, Јегуновце и Долнени.
Во Студеничани гори во реонот на селата Моране, Вртекица и Рамни Габер, каде е зафатена мешана шума. Во Македонски Брод активни се пожарите кај местото Видуш, во близина на селата Драгов Дол и Локвица, каде што гори ниска вегетација, нискостеблеста шума и грмушки.
Активен пожар е регистриран и во околината на селото С’лп во Велес, во местото Горно Село кон селото Добрино, на територијата на Општина Зелениково. Таму огнот зафатил ниска вегетација и дабова шума.
Во Општина Јегуновце пожарот кај селата Копанце и Туденце се проширил кон селото Бојане во Општина Сарај, при што гори шума. Активен пожар има и во селото Црнилиште во Општина Долнени, каде што е зафатена ниска вегетација.
Под контрола се ставени четири пожари. Тие се регистрирани во три подрачја во Општина Крушево – кај селата Борино и Житоше, Алданци и Норово, како и кај селото Селце. Во Општина Маврово-Ростуше пожарот кај селото Бибај е ставен под контрола.
Во текот на денот се изгаснати осум пожари и тоа во општините Битола, Липково, Чешиново-Облешево, Струга, Кичево, Могила, Долнени и Бутел.
