Седумнаесет возачи биле лишени од слобода во изминатото деноноќие поради сомнение за сторено кривично дело „безобѕирно управување со возило“, информира Министерството за внатрешни работи.
Од МВР соопштуваат дека 12 од приведените управувале возила без положен возачки испит. Меѓу нив има и четворица малолетници – двајца од Скопје, еден од кочанско и една малолетничка од Виница.
Покрај нив, четворица возачи биле лишени од слобода поради управување возило под дејство на алкохол. Станува збор за Б. Б. (50) од струшко, Р. Д. (51) од Прилеп, Р. Ј. (56) од тетовско и А. Н. (39) од Прилеп.
Од слобода бил лишен и 27-годишниот П. Р. од Гостивар, кој управувал возило во спротивен правец на еднонасочна улица.
Од МВР информираат дека по целосното документирање на случаите против сите лица ќе бидат поднесени соодветни кривични пријави.
Полицијата апелира до сите учесници во сообраќајот да ги почитуваат сообраќајните правила и прописи, да не управуваат возила без положен возачки испит, за време на изречена забрана за управување или под дејство на алкохол.
