Во 2025 година електричните автомобили достигнале рекордно учество во новите регистрации во Европската Унија. Целосно електричните патнички автомобили сочинувале 17,3 отсто од сите новорегистрирани возила, покажуваат податоците на Евростат.
Тоа значи дека повеќе од секој шести новорегистриран патнички автомобил во ЕУ бил целосно електричен. За споредба, во 2015 година нивното учество изнесувало само 0,4 отсто.
Хибридните возила имале најголем удел со 42,4 отсто, додека бензинските автомобили учествувале со 27,3 отсто, а дизел-возилата со 9,8 отсто.
Меѓу земјите членки на ЕУ, Данска имала најголем удел на електрични автомобили во новите регистрации – 67,8 отсто. Следуваат Холандија со 40,2 отсто и Малта со 37,6 отсто.
Германија во 2025 година имала удел од 19,1 отсто, што е над просекот на ЕУ. Во земјата биле регистрирани околу 545.100 нови електрични автомобили, со што Германија учествувала со 28,9 отсто во вкупните 1,89 милиони новорегистрирани електрични автомобили во ЕУ.
Франција била втора според бројот на новорегистрирани електрични автомобили, со околу 330.900 возила, односно 17,5 отсто од вкупниот број во Унијата.
На другата страна се Хрватска со 1,9 отсто, Словачка со 4,7 отсто и Бугарија со 4,9 отсто удел на целосно електрични автомобили во новите регистрации.
Растот на електромобилноста се поврзува со различни фактори, меѓу кои подобрувањето на инфраструктурата за полнење, достапноста на поевтини модели и националните мерки за поддршка.
На европско ниво, највисок удел има Норвешка, која не е членка на ЕУ. Во 2025 година повеќе од 95 отсто од новорегистрираните патнички автомобили во земјата биле целосно електрични.
