18 возачи приведени за безобѕирно возење, меѓу нив и двајца малолетници

Во текот на изминатото деноноќие, полициските службеници на територијата на целата држава лишиле од слобода 18 возачи поради безобѕирно управување со моторни возила.

— реклама —

Од нив, 15 управувале возила без возачка дозвола, а меѓу нив имало и двајца малолетници. Најголем број од приведените се од Гостивар, каде биле лишени од слобода пет лица, меѓу кои еден малолетник, а едно лице претходно учествувало и во сообраќајна незгода. Во Скопје биле приведени четири возачи, во Кичево две лица, од кои едно малолетно, а по едно лице било лишено од слобода во тетовско, Кривогаштани, Прилеп и Битола.

— реклама —

Во Делчево бил приведен возач кој управувал возило под дејство на алкохол, додека во Кичево и Кавадарци биле приведени по едно лице кои управувале моторно возило и покрај изречена забрана за возење.

— реклама —

Од МВР информираат дека по целосно документирање на случаите против сите ќе бидат поднесени соодветни кривични пријави.

— реклама —

Воедно, Министерството повторно апелира до сите учесници во сообраќајот да ги почитуваат сообраќајните правила, да не управуваат возила без возачка дозвола, доколку имаат изречена забрана за управување или под дејство на алкохол, со цел да се придонесе за поголема безбедност на патиштата.