Дури 185 прекршоци се констатирани при засилените сообраќајни контроли спроведени низ целата држава за возачите на лесни електрични возила, велосипеди, мопеди, мотоцикли и други лесни превозни средства.
Контролите биле спроведени вчера, 10 септември, од 17 до 21 часот од страна на Секторот за сообраќајни работи при Министерството за внатрешни работи, со цел санкционирање на прекршоците и зголемување на безбедноста во сообраќајот.
Кај возачите на велосипеди, велосипеди со помошен мотор, мопеди, мотоцикли, трицикли и четирицикли биле утврдени 152 прекршоци. Најголем дел, односно 120, биле поради некористење заштитен шлем.
При контролите на лесните електрични возила биле констатирани уште 33 прекршоци, од кои најголем број се однесувале на некористење велосипедска патека, велосипедска лента или патека наменета за велосипедисти.
Најмногу прекршоци од оваа категорија се констатирани на подрачјето на СВР Битола – 45. Следуваат СВР Тетово со 26, СВР Велес и СВР Струмица со по 25, СВР Охрид со 20, СВР Штип со 13, СВР Скопје со 12 и СВР Куманово со 10 прекршоци. Мобилната единица за безбедност во сообраќајот констатирала девет прекршоци.
Во текот на акциската контрола биле утврдени и 443 прекршоци од друг вид, а биле поднесени и пет кривични пријави согласно член 297-а од Кривичниот законик.
За сите констатирани прекршоци биле преземени соодветни мерки и изречени санкции согласно законските прописи.
Од МВР најавуваат дека продолжуваат со засилени сообраќајни контроли, со цел зголемување на безбедноста на сите учесници во сообраќајот и доследно почитување на сообраќајните правила и прописи.
