СВР Битола поднесе кривични пријави против три физички лица од Прилеп и едно правно лице, поради сомнение дека преку повеќе кривични дела бил оштетен АД „Тутунски комбинат“ – Прилеп за повеќе од 3,3 милиони денари.
Пријави се поднесени против Љ.Б. (59), поради сомнение за „проневера во службата“, „злоупотреба на службената положба и овластување“ и „фалсификување службена исправа“, против К.С. (60) за „несовесно работење во службата“, како и против Ј.Д. (41) за „прикривање“ и „фалсификување службена исправа“. Кривична пријава е поднесена и против правно лице од село Мало Коњари, прилепско, за сомнение за сторено кривично дело „прикривање“.
Според МВР, првопријавениот во текот на 2021 и 2022 година бил координатор на група за обезбедување во „Тутунски комбинат“, додека второпријавениот во истиот период ја извршувал функцијата генерален извршен директор. Третопријавениот бил сопственик и управител на фирмата од Мало Коњари, која имала договор со комбинатот за откуп на отпадни материјали.
Во првото тримесечје од 2022 година, според пријавата, Љ.Б., спротивно на одлуката за продажба на основни средства, ситен инвентар и резервни делови како отпадни материјали, по усен предлог на тогашниот генерален извршен директор К.С., добил можност да ја спроведува продажбата на отпадот наместо референтот задолжен за управување со отпад.
МВР сомничи дека во февруари 2022 година Љ.Б., со помош на Ј.Д., прикрил најмалку 185.000 килограми отпадно железо од Работната единица „Заводи – Мажучиште“ и не го евидентирал на сметката на Тутунскиот комбинат.
Отпадното железо било предадено и откупено од фирмата од Мало Коњари по цена повисока за два денари по килограм. Наместо средствата да бидат уплатени на сметката на комбинатот, според МВР, биле изготвувани фиктивни откупни белешки за количини од околу 25.000 килограми на име на осум физички лица, за кои се наведува дека биле блиски лица на првопријавениот.
Парите потоа биле префрлани на банкарски сметки на седум физички лица, како и на личната сметка на Љ.Б. По подигнувањето на средствата во готовина, тие му биле предавани на првопријавениот, според сомнежите наведени во кривичната пријава.
На ваков начин, на сметките на физичките лица и на Љ.Б., според МВР, биле префрлени вкупно 3.338.328 денари, за кој износ бил оштетен „Тутунски комбинат“ – Прилеп.
Во исто време, на сметката на АД „Тутунски комбинат“ – Прилеп, по основ на продажбата на отпадното железо, фирмата од Мало Коњари уплатила вкупно 1.274.560 денари.
