Вкупно 1.875 прекршоци биле констатирани во текот на август при зајакнатите сообраќајни контроли насочени кон возачите на велосипеди, мопеди, мотоцикли и други лесни моторни возила.
Секторот за сообраќајни работи при МВР контролите ги спровел на целата територија на државата, при што најголем број прекршоци биле евидентирани на подрачјето на СВР Скопје – 503. Следуваат СВР Битола со 230, СВР Струмица со 216, СВР Охрид со 179, СВР Тетово со 178, СВР Штип со 169, Мобилната единица за безбедност на сообраќајот на патиштата со 147, СВР Велес со 128 и СВР Куманово со 125 прекршоци.
Најголем дел од констатираните прекршоци, односно 1.563, се однесувале на неносење заштитен шлем – кацига при управување со возилото. За сите прекршоци биле преземени соодветни мерки согласно законските прописи.
Во рамки на акциските контроли биле поднесени и 116 кривични пријави против возачи согласно член 297-а од Кривичниот законик, додека согласно член 300-б биле одземени 97 мотори.
Дополнително, полицијата констатирала уште 3.259 прекршоци од друг вид.
Од МВР најавуваат дека продолжуваат со зајакнати сообраќајни контроли на целата територија, со цел зголемување на безбедноста на сите учесници во сообраќајот и доследно почитување на сообраќајните правила и прописи.
