При контролата на психијатриската болница „Демир Хисар“ во декември 2025 година, тимот на Националниот превентивен механизам (НПМ) при Народниот правобранител затекнал околу 20 осуденици кои, според нивните наоди, не страдаат од психичка болест, туку преку спорни психијатриски вештачења успеале да избегнат издржување затворски казни.
Ова денеска го соопшти заменик-народниот правобранител Соња Трифуновска при презентацијата на извештајот на НПМ, истакнувајќи дека поради сериозноста на наодите НПМ се обратил и до Комората на вештаци со барање за информации за примената на етичките и професионалните стандарди во судско-психијатриските вештачења.
Според Трифуновска, ваквата состојба создава сериозни проблеми во функционирањето на Форензичкото одделение во болницата, бидејќи здравствениот персонал е принуден, покрај својата терапевтска работа, да врши и безбедносни задачи.
Од НПМ посочуваат дека лицата кои не се вистински пациенти често ги вознемируваат и злоупотребуваат останатите пациенти, организираат бегства, а персоналот е изложен на закани и сериозен професионален притисок.
„Се отвора прашањето за сериозно отстапување од целта на кривичноправниот систем и суштинско поткопување на принципот на еднаквост пред законот“, предупреди Трифуновска.
Во извештајот се наведува и дека во периодот од 2024 година до посетата на НПМ, во болницата биле сменети четворица директори, што дополнително влијаело врз функционирањето на установата.
Според НПМ, ваквата состојба директно ги погодува вистинските психијатриски пациенти, кои поради преоптовареноста на персоналот добиваат помалку внимание и се лекуваат во влошени услови.
