Новак Ѓоковиќ успешно го започна настапот на АТП-турнирот во Пекинг, совладувајќи го Нуно Боржес во првото коло. За српскиот тенисер ова беше враќање во кинеската престолнина по пауза од 11 години.
Со триумфот, Ѓоковиќ стигна до неверојатен учинок од 30 победи во исто толку одиграни мечеви во Пекинг. Тој досега шестпати ја освојувал титулата на турнирот.
По мечот, Ѓоковиќ не го криеше задоволството што повторно настапува во градот каде што има совршен биланс.
„Драго ми е што се вратив на моето среќно место. Ви благодарам што го исполнивте стадионот, атмосферата беше феноменална“, изјави Ѓоковиќ.
На прашањето како успева да има 30 победи од 30 мечеви во Пекинг, тој посочи дека станува збор за комбинација од повеќе фактори.
„Сакам да играм овде. Условите навечер ми одговараат на играта. Пред 11 години беше така. Јас веќе не сум истиот играч, но и сега се чувствувам добро овде“, рече српскиот тенисер.
Ѓоковиќ се осврна и на времето поминато во Пекинг пред турнирот, посочувајќи дека имал можност подобро да ја запознае кинеската култура.
„Вчера поминавме прекрасно, се запознававме со културата и обичаите. Има многу работи што можат да се научат. Во текот на целата кариера се обидувам да го правам тоа“, додаде Ѓоковиќ.
