Министерството за енергетика, рударство и минерални суровини ги повика граѓаните да аплицираат на јавниот повик за субвенции за приклучување на природен гас и за набавка на котел на гас, преку кој може да се добие финансиска поддршка до 30.000 денари, односно до 70 проценти од направените трошоци.
Од Министерството информираат дека рокот за поднесување на барањата е до 31 октомври 2026 година, а право на финансиска поддршка имаат домаќинства што во текот на годинава ќе извршат приклучок на системот за дистрибуција на природен гас, како и домаќинства што ќе набават котел на природен гас за објект кој бил приклучен на системот најдоцна до 1 јануари 2026 година. За едно домаќинство може да се поднесе едно барање.
За реализација на мерката се обезбедени 3 милиони денари, а средствата ќе се распределуваат по принципот „прв дојден – прв услужен“, сè до нивното исцрпување.
По истекот на рокот, комисија формирана од Министерството ќе ги разгледа пристигнатите апликации, а финансиската поддршка ќе им биде исплатена на сите апликанти што ги исполнуваат условите од јавниот повик.
Од Министерството посочуваат дека со оваа мерка се намалуваат трошоците за домаќинствата, се поттикнува користењето на природен гас како почист енергенс и се придонесува за поголема енергетска ефикасност и подобар квалитет на животната средина.
Повеќе информации за условите и начинот на аплицирање се достапни на веб-страницата на Министерството.
