Вкупно 31 пожар на отворен простор биле регистрирани во Македонија до 07:30 часот на 11 септември, од кои два и натаму се активни, четири се ставени под контрола, а 25 се целосно изгаснати, информира Центарот за управување со кризи.
Активни се пожарите во општина Македонски Брод, во селото Белица, на местото Кајорец, каде што гори нискостеблеста и мешана шума, како и во општина Чучер-Сандево, во селото Брест, на местото Рамно, каде што е зафатена мешана шума.
Под контрола се пожарите во Бенче во општина Македонски Брод, во Тајмиште, на местото Дарда, во општина Кичево, на градската депонија во Делчево и во селото Копаница во општина Сарај.
Меѓу 25-те изгаснати пожари има случаи на запалена ниска вегетација, шума и отпад на повеќе локации. Пожари биле регистрирани во Струга, Враништа, Радолишта и на потегот Буринец–Локов–Селце–Елевци, како и во Куманово, Крива Паланка, Карпош, Гази Баба, Кривогаштани, Струмица, Желино, Јегуновце, Ѓорче Петров, Шуто Оризари, Ново Село, Кичево, Радовиш, Старо Нагоричани и Неготино.
Во дел од случаите гореле депонии и отпад, додека на други места биле зафатени ниска и нискостеблеста вегетација, мешана и високостеблеста шума, како и стрништа.
Од ЦУК информираат дека состојбата со пожарите се следи и дека надлежните служби постапуваат согласно состојбите на терен.
