Во изминатото деноноќие во Македонија се регистрирани 31 пожар на отворен простор, од кои три сè уште се активни, четири се под контрола, а 24 се целосно изгаснати, информира Центарот за управување со кризи.
Според информацијата на ЦУК, заклучно со 07:30 часот денеска активни се пожарите во три општини.
Во општина Струга гори во реонот на селата Буринец, Локов, Селце и Елевци, каде е зафатена нискостеблеста шума.
Во општина Македонски Брод активен е пожарот кај селото Белица, на месноста Кајорец, каде што е зафатена нискостеблеста и мешана шума.
Активен пожар има и во општина Чучер-Сандево, во селото Брест, на месноста Рамно, каде гори мешана шума.
Под контрола се пожарите во селото Бенче во општина Македонски Брод, во Тајмиште, на месноста Дарда, во општина Кичево, во селото Грачани во општина Ѓорче Петров и на градската депонија во Делчево.
Во текот на деноноќието се изгаснати 24 пожари на различни локации низ земјата.
Во Скопје се регистрирани пожари кај Бардовци, на булевар „Илинденска“ во близина на ЈП „Водовод“, на Љуботенски пат, како и во Копаница и Паничари во општина Сарај.
Пожари се изгаснати и во повеќе општини низ земјата, меѓу кои Прилеп, Долнени, Кривогаштани, Ново Село, Струмица, Босилово, Охрид, Кичево, Штип, Берово, Куманово, Старо Нагоричане, Крива Паланка, Тетово, Гостивар и Врапчиште.
Според ЦУК, меѓу изгаснатите пожари имало огништа на ниска вегетација, шума, стрништа, грмушки, депонии и отпад.
