4,6 милиони евра провизии за незавршена железница, СДСМ и ДУИ должат одговори, вели ВМРО-ДПМНЕ

ВМРО-ДПМНЕ бара Јавното обвинителство да постапи по наодите на Државниот завод за ревизија за железничкиот Коридор 8 и да утврди дали постои основа за кривична одговорност за одлуките и постапувањето со средствата за проектот.

Од владејачката партија се повикуваат на наоди на ДЗР според кои државата платила 4,6 милиони евра провизии за неповлечени средства, во период во кој реализацијата на железничкиот Коридор 8 доцнела.

— реклама —

„Државата плаќала 4,6 милиони евра провизии за неповлечени средства додека железничкиот Коридор 8 со години стоел незавршен“, велат од ВМРО-ДПМНЕ.

Партијата за состојбата ги обвинува поранешните владејачки партии СДСМ и ДУИ, оценувајќи дека станува збор за последица на неефикасно и неодговорно управување со стратешките инфраструктурни проекти.

— реклама —

„Првата и втората фаза не биле завршени, роковите биле пробиени, а наместо железничка инфраструктура граѓаните добиле милионски трошоци и нови долгови“, соопшти ВМРО-ДПМНЕ.

Од партијата посочуваат и на наодот за третата фаза од железничкиот Коридор 8, тврдејќи дека ДЗР предупредил на ризик од губење европски грант во износ од 61 милион евра.

— реклама —

„Кој е одговорен за овие пропусти? Кој дозволил државата да плаќа милиони евра провизии? И кој ќе одговара ако со нечие постапување или непостапување е нанесена штета на државниот буџет?“, прашуваат од ВМРО-ДПМНЕ.

Партијата бара Обвинителството да ги испита одлуките, договорите и постапките поврзани со проектот, како и евентуалната одговорност на лицата вклучени во нив.

— реклама —

„Јавното обвинителство мора да постапи по наодите на ДЗР. Да се испитаат сите одлуки, договори, постапки и одговорни лица и да се утврди дали има основа за кривична одговорност“, велат од ВМРО-ДПМНЕ.

Од партијата заклучуваат дека 4,6 милиони евра провизии, повеќегодишното доцнење на железничката инфраструктура и ризикот за европските средства се резултат на управувањето на претходната власт и бараат одговорност за евентуално нанесена штета на државата.