На Клиниката за детски болести од грип почина 5-годишно дете. Како што информираат од клиниката девојчето е примено вчера откако три дена се лекувало од вирусна пневмонија во Институтот за белодробни заболувања Козле, пишува Слободен печат.
„Поради влошување на состојбата со појава на невролошки симптоми (пореметена свест, конвулзии) детето е префрлено на Клиника и првично примено на одделот за неврологија. Веднаш е свикан конзилиум, земени се лабораториски иследувања и поради тешката состојба со засегнување на мозокот и црниот дроб, префрлено е на одделот за интензивна нега и терапија. Лабораториски се потврди пандемски грип – H3N1 грип тип A. Дадена е терапија со тамифлу, антибиотска терапија, кислородна поддршка, хепатопротективна терапија, антиконвулзивна терапија, интравенски имуноглобулини, плазма и друга специфична терапија. Поради влошување на респираторните симптоми детето е интубирано, но и покрај сите преземени мерки почина во 23.30 часот после 13 часа престој на Клиниката“, информираат од Клиниката за детски болести.
Детето е од Скопје и претходно често се следело и лекувало во Институтот во Козле и на Клиника со дијагноза астма.
