Министерството за земјоделство, шумарство и водостопанство, во координација со Агенцијата за храна и ветеринарство (АХВ), продолжува со засилено следење на состојбата со сипаниците кај овците и козите, по апелот од Сојузот на одгледувачи на овци за итно преземање дополнителни мерки.
Министерот Борче Серафимовски и директорот на АХВ Оливер Миланов се во постојана координација, а надлежните служби секојдневно ги анализираат податоците од погодените региони и ефектите од досегашните мерки.
При секој сомнителен случај, преку ветеринарните друштва се земаат крв и брисеви од животните и се испраќаат на лабораториско испитување. Доколку присуството на вирусот биде потврдено, АХВ определува контролни и заштитни мерки, меѓу кои и евтаназија на заразените животни и нивно безбедно отстранување.
Како дополнителна мерка, од Турција се обезбедени 500.000 дози вакцина како донација, кои се очекува да пристигнат во наредните денови. Дополнително, до Европската комисија е испратено барање за обезбедување дополнителни количества.
Експертската група при АХВ редовно ја следи епидемиолошката состојба и ги утврдува следните чекори, а повторно е побарана и стручна помош од тимот EUVET на Европската комисија.
Пред да започне употребата, вакцините ќе бидат лабораториски испитани за безбедност и чистота. Вакцинацијата ќе се спроведува само по потврдување на резултатите, според официјален план и под надзор на АХВ.
Од Министерството и АХВ апелираат до сточарите да не преземаат вакцинација на своја рака. Самостојното набавување и користење вакцина без одобрение од АХВ ќе биде санкционирано, а во таков случај сопствениците нема да имаат право на компензација за заболените или обесштетување за животните кои ќе бидат одземени согласно мерките за сузбивање на болеста.
