Вкупно 72 возачи на лесни електрични возила биле санкционирани во текот на вчерашната акциска контрола на МВР, спроведена на територијата на целата држава.
Контролата ја реализирал Секторот за сообраќајни работи при МВР на 13 август, во периодот од 17:00 до 22:00 часот, со цел санкционирање на прекршоците што ги прават возачите на лесни електрични возила.
Најмногу санкции, по 11, биле изречени на подрачјата на СВР Тетово и СВР Битола, додека осум возачи биле санкционирани на подрачјето на СВР Велес, а седум на подрачјето на СВР Куманово. Дополнителни 20 возачи биле санкционирани од Мобилната единица за безбедност на сообраќајот на патиштата.
Во текот на контролата биле констатирани и санкционирани уште 260 различни сообраќајни прекршоци.
Од МВР најавуваат дека сообраќајните контроли ќе продолжат и во наредните денови и апелираат до сите учесници во сообраќајот да ги почитуваат правилата и прописите, со цел зголемување на безбедноста на патиштата.
