Американскиот претседател Доналд Трамп и украинскиот претседател Володимир Зеленски соопштија дека е постигнат значителен напредок во разговорите за завршување на војната во Украина, по нивната средба одржана на Флорида. Иако двајцата лидери ги оценија разговорите како исклучително позитивни, Трамп предупреди дека остануваат „едно или две многу чувствителни прашања“ кои допрва треба да бидат решени, при што како клучна пречка повторно го посочи прашањето за територијата.
Обраќајќи се пред медиумите во Мар-а-Лаго, Зеленски изјави дека е постигната согласност за околу 90 проценти од мировниот план од 20 точки, додека Трамп наведе дека договорот за безбедносни гаранции за Украина е речиси целосно усогласен, со околу 95 проценти согласност. Сепак, американскиот претседател не даде конкретно ветување за распоредување американски трупи или за директна воена заштита од евентуални идни напади.
Зеленски најави дека украинските и американските преговарачки тимови ќе продолжат со интензивни средби уште наредната недела, со цел финализирање на договорот за ставање крај на конфликтот кој трае речиси четири години. Во порака објавена на Телеграм, украинскиот претседател нагласи дека разговорите биле суштински и дека е постигнат напредок како резултат на повеќенеделната работа на двата тима.
Најтешкото прашање, според Трамп, останува статусот на регионот Донбас, кој во голем дел е под руска контрола. Американскиот претседател потврди дека предлогот за трансформација на Донбас во демилитаризирана зона сè уште не е усогласен. Во моментов, Русија контролира околу 20 проценти од украинската територија, вклучувајќи околу 75 проценти од Доњецката област и речиси целосно Луганската област.
„Дел од таа земја е окупиран, а дел е предмет на спор и ќе мора да се реши“, изјави Трамп, додавајќи дека станува збор за исклучително комплексно прашање. Москва бара Украина целосно да се повлече и од преостанатите делови на Донбас кои се под контрола на Киев, додека украинската страна предлага тие области да добијат статус на слободна економска зона, под украински надзор.
Во дипломатска позадина на средбата со Зеленски, Трамп претходно телефонски разговарал со рускиот претседател Владимир Путин. Иако не изнесе детали, американскиот претседател изјави дека смета оти Путин „сака Украина да успее“, но истовремено призна дека Москва не е подготвена за примирје кое би овозможило одржување референдум за територијалните прашања. „Го разбирам тој став“, додаде Трамп.
Рускиот советник за надворешна политика Јуриј Ушаков потврди дека разговорот бил инициран од американската страна и дека ставот на Москва е оти привремено примирје, како што предлагаат Европската Унија и Украина, само би го пролонгирало конфликтот. Трамп воедно отвори можност за тројни разговори меѓу САД, Русија и Украина, оценувајќи дека таков формат би можел да се реализира „кога ќе дојде вистинскиот момент“.
Од европските сојузници стигнаа внимателно позитивни реакции. Зеленски најави дека украински претставници би можеле да ја посетат Белата куќа во јануари, можеби заедно со европски лидери. Претседателката на Европската комисија, Урсула фон дер Лајен, го поздрави „добриот напредок“ во разговорите, нагласувајќи дека цврстите безбедносни гаранции за Украина се неопходни од првиот ден.
Францускиот претседател Емануел Макрон најави дека почетокот на јануари ќе донесе средба во Париз на земјите од таканаречената „Коалиција на подготвени“, со цел прецизирање на конкретните придонеси за долгорочната безбедност на Украина. Според него, фокусот ќе биде ставен на стабилен мировен договор што нема да остави простор за нова ескалација на конфликтот.
