Адвокатот Владимир Туфегџиќ реагираше откако Апелациониот суд Скопје го укина ослободителниот дел од пресудата за Александар Ѓорчевски, таткото на Александар Ѓорчевски, и предметот го врати на повторно судење.
Туфегџиќ вели дека не е изненаден од ваквата одлука и дека ја очекувал по јавната седница пред Апелациониот суд.
„По однос на укинувањето на ослободителната пресуда за таткото на Вања, како адвокат сум еден од ретките што воопшто не е изненаден од ваквата одлука и очекував ваков исход после онаков агресивен настап на вишиот јавен обвинител на јавната седница пред Апелациониот суд на 11.05.2026 година“, вели Туфегџиќ.
Тој оценува дека денешното соопштение на Апелациониот суд е премногу кусо и без образложение за причините поради кои е донесена одлуката.
„Денешното штуро соопштение на Апелациониот суд без наводи на барем еден ред за причините за ваквата одлука, доволно говори само по себе“, наведува адвокатот.
Според него, во повторената постапка е подготвен да слушне и поинаква одлука врз основа на истите докази.
„Во повторената постапка спремен сум да слушнам и поинаква одлука за Александар врз основа на истите докази за кои обвинителот кажа дека немаат докази, особено поради фактот што Александар е од некого од првиот ден проектиран да биде однапред осуден, само треба да се запази формата“, додава Туфегџиќ.
Тој нагласува дека како адвокат единствено го користи своето правно знаење во одбраната на клиентите и дека нема институционални механизми за влијание врз судските постапки.
„Јас како адвокат сум само една мала карика во општеството кој само и исклучиво само со своето најдобро правно знаење ги бранам моите клиенти, немам влијание ниту институционални механизми за влијание или притисок за да можам на тој начин да влијаам на нештата. На крајот од денот, сите живееме со сопствените одлуки и сопствената совест“, порача Туфегџиќ.
