Африканска држава воведе строга мерка: Суровото злато повеќе нема да ја напушта земјата

Гвинеја го забрани извозот на непреработено злато со цел да ја поттикне домашната преработка на овој благороден метал и да создаде нови работни места.

Одлуката стапува во сила веднаш, а беше донесена по состанокот на претседателот Мамади Думбуја со претставници на индустриските и занаетчиските производители и откупувачи на злато.

— реклама —

„Гвинеја отсега ќе бара нејзиното злато да се преработува во рамките на нејзините граници. Суровото злато повеќе нема да ја напушта Гвинеја“, изјави Думбуја, додавајќи дека досега други земји ги собирале економските придобивки од преработката и трговијата со гвинејските суровини.

— реклама —

Според податоците на Светскиот совет за злато, Гвинеја е шестиот најголем производител на злато во Африка.

Во последните години и други африкански држави презедоа слични чекори за да ја зголемат домашната преработка и додадената вредност во рударскиот сектор. Танзанија и Уганда веќе воведоа забрани за извоз на непреработени минерали и метали, додека Гана планира да забрани извоз на сурово злато до 2030 година.

— реклама —

Во главниот град Конакри во завршна фаза е изградбата на нова рафинерија, каде што ќе се преработува гвинејското злато пред извозот. Според властите, капацитетот на рафинеријата ќе изнесува 250 тони годишно, што е доволно за целокупното сегашно производство на земјата.

Странските компании кои работат во земјата се предупредени дека во случај на непочитување на новите правила ризикуваат губење на лиценците и раскинување на договорите за експлоатација.

Покрај златото, Гвинеја е и најголем светски производител на боксит, суровина што се користи за производство на алуминиум.