Африканската свинска чума се приближува до македонската граница. Откако, во соседна Бугарија се појави ново жариште на болеста во областа Русе, Агенцијата за храна и ветеринарство ги подигна мерките на безбедност. . Оваа болест не е опасна за човекот, но е смртоносна за стоката и каде ќе се појави животните мора да бидат уништени.
Со цел заштита од внесување на вирусот во земјава, АХВ презема повеќе мерки, но и едукативни активности за одгледувачите на свињи. Постојано се проверува и контролира биобезбедноста на фармите, а домаќинствата кои одгледуваат свињи не смеат да ги пуштаат на отворено. Се врши и мониторинг на присуство на чумата кај дивите свињи, бидејќи тие се најчестите преносители на болеста.
Од АХВ апелираат граѓаните да не внесуваат храна од животинско потекло во земјава.
Африканската свинска чума се појавила во 2007 година во Казахстан, а во моментов е присутна во Бугарија, Романија, Унгарија и други држави од Источна Европа. Болеста предизвикува големи економски штети и загуби во свињарството, не се лекува и не постои вакцина за заштита.
Инаку во Бугарија досега се откриени 19 случаи на свинска чума на фармите. Сите свињи на овие фарми ќе бидат заклани.
Експертите велат дека поради епидемијата на високо заразната болест би можеле да настрадаат околу 500.000 свињи.
Војската и полицијата се мобилизирани во битката против вирусот и во заштитата на други фарми. Се врши дезинфекција на фармите, ограничена е продажбата на свинско месо, а се контролираат и граничните премини.
