Акциска контрола на Охридското Езеро: Пронајдени 20 забранети мрежи и речиси 117 килограми риба

Полициските службеници од Полициската станица за граничен надзор „Охридско Езеро“ при акциска контрола на езерото пронајдоа голем број забранети рибарски мрежи и значителна количина уловена риба.

— реклама —

На 1 септември, при контролите насочени кон сузбивање на незаконитиот риболов, на потегот меѓу струшките села Калишта и Радожда биле пронајдени 20 таканаречени висечки рибарски мрежи, кои се строго забранети за лов на риба.

— реклама —

Мрежите биле со вкупна должина од околу 4.000 метри, а во нив биле пронајдени 872 парчиња охридска белвица, со вкупна тежина од 116,9 килограми.

— реклама —

По насоки на јавен обвинител, полициските службеници од езерската полиција и од Регионалниот центар за гранични работи „Запад“ ги подигнале мрежите заедно со уловот, по што бил известен надлежниот инспекторат за рибарство.

Од МВР информираат дека во наредниот период Полициската станица за граничен надзор „Охридско Езеро“ ќе продолжи со засилени акциски контроли, со цел спречување на незаконитиот риболов, откривање на сторителите и заштита на рибниот фонд во Охридското Езеро.