Три вообичаени симптоми што се појавуваат веднаш по будењето можат да бидат рани предупредувачки знаци за дијабетес тип 2, предупредува фармацевтот Абас Канани. Според него, многу луѓе ги занемаруваат овие симптоми бидејќи не создаваат чувство на сериозна болест.
Како што изјавил за британскиот „Експрес“, најчестите утрински симптоми се засилена жед, постојано чувство на глад и потреба за почесто мокрење.
Прекумерната жед, позната како полидипсија, е еден од првите знаци на дијабетес. Иако е нормално повремено да чувствуваме жед, постојаната и невообичаено силна жед, дури и по внесување течности, може да биде причина за загриженост.
Вториот симптом е полифагија, односно прекумерна глад. Кај дијабетес тип 2 организмот потешко ја користи енергијата од храната, што може да предизвика постојано чувство на глад.
Третиот знак е полиурија – потреба за почесто мокрење од вообичаено.
Британскиот Национален здравствен систем (NHS) наведува и други можни симптоми, како што се изразен замор, ненамерно губење телесна тежина, заматен вид и бавно зараснување на рани и исеченици. Може да се појават и чести габични инфекции или чешање во интимната регија.
Доколку забележите некој од овие симптоми, лекарите препорачуваат што поскоро да се обратите кај матичен лекар. Едноставен тест на крвта може да потврди или да ја исклучи дијагнозата.
