Алијансата на Зијадин Села излегува од ДУИ

Алијансата за Албанците на Зијадин Села од денеска тргнува по свој политички пат. По состанокот на партиското Претседателство, крилото под раководство на Села соопшти дека ја напушта коалицијата Национална алијанса за интеграција предводена од ДУИ и дека пратениците на партијата во Собранието ќе формираат независна пратеничка група.

— реклама —

Во соопштението се наведува дека изминатите локални избори и начинот на кој завршија биле клучниот момент за ваквиот чекор. Иако коалицијата во која учествуваше АА освои најмногу гласови на национално ниво во советничките листи, партијата тврди дека резултатите во битките за градоначалници биле деформирани од, како што велат, „државен инженеринг“ и координирани дејствија меѓу албанските партии на власт и македонските политички субјекти. Според Села, целта била исполнување на политичката агенда на ВМРО-ДПМНЕ за „дефакторизација на Албанците“.

— реклама —

„Под ваквите сценарија, најмногу изгубија самите Албанци, кои по централната власт се деградирани и на локално ниво“, стои во текстот потпишан од Села. Партијата нагласува дека, и покрај изборниот исход, останува целосно посветена на националната кауза и на заштитата на правата и рамноправноста на Албанците во државата.

— реклама —

Членовите на Претседателството, по долги дискусии, едногласно ја поддржале одлуката за самостојно делување. Во следните денови, пратениците на АА ќе ја формализираат одлуката во Собранието со оформување независна група.

Партијата наведува дека ќе продолжи активно да ја критикува политиката на актуелната власт и да соработува со другите субјекти на албанската опозиција. Националната кауза, уставните права и санирањето на, како што велат, „штетите од оваа Влада“ остануваат нивна централна платформа за понатамошно дејствување.