Алкарас се врати на тронот: Прва титула по 247 дена

Карлос Алкарас повторно стигна до трофеј, откако го освои АТП-турнирот од серијата 500 во Токио. Шпанскиот тенисер во финалето го совлада Јиржи Лехечка во два сета, со 7:6(4), 6:4, по нешто повеќе од час и половина игра.

За Алкарас ова е прва титула по 247 дена, односно прва по триумфот на Катар опен во Доха во февруари.

— реклама —

Периодот по тој трофеј беше обележан со сериозна повреда на десниот зглоб. Алкарас се повреди за време на мечот од првото коло на турнирот во Барселона против Ото Виртанен. Иако го доби натпреварот, прегледите следниот ден покажале дека станува збор за посериозна повреда – теносиновитис, односно воспаление на тетивата и нејзината заштитна обвивка во пределот на палецот и десниот зглоб.

Поради повредата мораше да ги пропушти мастерсите во Мадрид и Рим, како и Ролан Гарос и Вимблдон. На теренот се врати за УС Опен, но беше елиминиран во четвртфиналето од Бен Шелтон по маратонски меч во пет сета.

— реклама —

На азиската турнеја во Токио и Шангај, Алкарас повторно почна да игра без завој и без болки. До финалето во Токио стигна преку Микелсен, Арналди, Шаповалов и сонародникот Хауме Мунар.

Патот до финалето, сепак, не беше без проблеми. Микелсен и Мунар му освоија по еден сет, додека Арналди пропушти четири сет-топки. Единствено Шаповалов не успеа да го заврши мечот, откако му го предаде на Алкарас.

— реклама —

Во финалето, Лехечка веднаш направи брејк, но Алкарас брзо се врати и израмни на 3:3. Во тај-брејкот Шпанецот ја искористи првата и единствена сет-топка и поведе.

Вториот сет беше значително пократок и без драматичноста од првиот, а Алкарас го приведе мечот до крај и ја освои титулата.

— реклама —

Турнирот во Токио се играше за награден фонд од 2.342.275 долари.