Карлос Алкарас продолжи во третото коло на АТП-турнирот во Токио, откако во возбудлив меч го совлада Американецот Алекс Микелсен со 2:1, по сетови 7:6, 4:6, 6:1.
Шпанецот и во вториот меч во Токио мораше да одигра три сета, откако во првото коло го совлада Јапонецот Сакамато во ист број сетови.
Микелсен имаше свои шанси уште во првиот сет. Поведе со 4:2, а при резултат 5:4 имаше три сет-топки на сервис на Алкарас. Сепак, Шпанецот успеа да се извлече, а потоа доминираше во тај-брејкот и го доби со 7:1.
Вториот сет донесе нови пресврти. Американецот поведе со 2:0, по што Алкарас освои четири гема во низа и поведе со 4:2. Микелсен, сепак, возврати со иста мера, освои четири последователни гема и го израмни резултатот во сетови.
Во решавачкиот сет Алкарас не му остави простор на противникот. Шпанецот брзо поведе со 2:0, потоа со 4:0 и 5:0, целосно преземајќи ја контролата врз играта. Микелсен успеа да освои само еден гем пред Алкарас да го затвори мечот со 6:1.
Во третото коло Алкарас ќе игра против Италијанецот Матео Арналди.
