Американски аналитичари разработија црно сценарио за иднината на Русија и Европа

Што би се случило доколку рускиот претседател Владимир Путин почине во јануари 2027 година? Американската истражувачка организација „РАНД корпорејшн“ објави хипотетичко сценарио во кое се разработува можниот развој на настаните во Русија, како и односите со НАТО во годините што следуваат.

Според сценариото, Путин би починал од природна смрт, по што во Русија би настанал вакуум на моќта. Во борбата за претседателската функција би победиле безбедносните служби, а до март 2027 година Кремљ би именувал поранешен генерал на ФСБ за негов официјален наследник.

— реклама —

Аналитичарите нагласуваат дека станува збор за хипотетички развој на настаните, а не за предвидување, и дека ова е само едно од неколкуте можни сценарија.

Во април 2027 година, новото руско раководство би склучило примирје со Украина во замена за делумно укинување на санкциите. Сепак, до јули преговорите би западнале во ќор-сокак, бидејќи Москва би одбила да ги повлече своите сили од окупираните територии, кои ги смета за дел од својата суверена територија.

До јануари 2028 година, новиот претседател би започнал да ги заменува најблиските соработници на Путин со луѓе лојални нему. Истовремено, Русија би се соочила со сериозна економска и општествена криза, меѓу другото и поради големите загуби во војната против Украина.

— реклама —

Поради послабата контрола врз власта во споредба со Путин, новиот претседател постепено би потпаднал под влијание на воинствено настроените кругови, кои би барале поагресивни мерки против НАТО.

Според сценариото, во 2028 година Москва би започнала хибридна војна против европските членки на Алијансата. Две години подоцна, искористувајќи ја претпоставената преокупираност на САД со криза во Јужна Америка, Кремљ би наредил воена операција против Естонија.

— реклама —

Операцијата би започнала во мај 2030 година, со организирање протести во Нарва, град во кој живее рускојазично население. Протестите би прераснале во немири, по што руските сили би влегле во градот под изговор дека го штитат населението што зборува руски јазик.

Наместо очекуваната воздржаност, НАТО би реагирал со активирање на членот 5 од Северноатлантскиот договор и испраќање сили за одбрана на Естонија. До јуни би започнале отворени судири меѓу руските и силите на Алијансата, кои, според сценариото, би траеле до октомври 2030 година.

Во меѓувреме, Русија би ги засилила саботажните активности против Обединетото Кралство, додека би избегнувала директно спротивставување со Турција. Сајбер-нападите и вооружените судири би се прошириле и на источниот и јужниот дел од НАТО.

— реклама —

По повеќемесечни интензивни борби, во ноември 2030 година би било постигнато привремено примирје. Русија би се соочила со внатрешен притисок поради неможноста брзо да ја совлада Естонија, додека европските земји би имале сè поголеми тешкотии во одржувањето на своите воени сили.

До јануари 2031 година примирјето би останало во сила, но мировните преговори би биле во застој. Според заклучокот на „РАНД“, ваквиот развој би можел да доведе до нов замрзнат конфликт и дополнителна дестабилизација на Европа, со што би се довеле во прашање кредибилитетот на НАТО и иднината на европската безбедност.