Ангелов: Дел од чадот во Скопје доаѓа од пожарите кај Бојане и на Китка

Дел од чадот што во изминатите денови се чувствува во Скопската Котлина доаѓа од пожарите на планините Жеден и Китка, информира директорот на Центарот за управување со кризи, Стојанче Ангелов.

— реклама —

Ангелов посочи дека по извршеното хеликоптерско извидување било утврдено дека дел од чадот што го чувствуваат жителите на одделни населби во Скопје доаѓа од пожарот во атарот на селото Бојане на планината Жеден.

„Од извршеното хеликоптерско извидување можевме да забележиме дека дел од чадот на кој се жалат жителите на градот Скопје во некои населби доаѓа од пожарот кој се одвива во атарот на село Бојане на планината Жеден“, изјави Ангелов.

— реклама —

Тој информираше дека на падината на планината се распоредени тетовски пожарникари со поддршка од нивните колеги од Скопје, при што очекува овој крак од пожарот да биде целосно сопрен во текот на денот.

— реклама —

„Тетовските пожарникари со поддршка на скопските се поставени на падината на планината и очекувам попладнево или денеска при вечер овој крак од пожарот да биде целосно сопрен“, рече Ангелов.

Сепак, според него, чадот што се шири низ Скопската Котлина не потекнува само од пожарот кај Бојане. Дел од него доаѓа и од пожарот на планината Китка, поради различното движење на ветровите над самото жариште во однос на воздушните струења во котлината.

Ангелов упати благодарност до пилотите на полициските хеликоптери, но и до воздухопловно-техничкиот персонал кој обезбедува техничка поддршка за нивната оперативност.