Ангелов: Два „ер трактори“ полетаа кон пожарот кај Милетино, огнот се заканува на селото

Стојанче Ангелов информира дека два „ер трактори“ се упатени кон Милетино во Општина Брвеница, каде што беснее голем пожар во близина на селото и постои опасност огнот да се приближи до населеното место. Тетовските пожарникари се на терен, но гаснењето во шумата е отежнато поради непристапниот и ризичен терен.

„Пред малку дадов наредба на ер тракторите да полетаат кон Милетино, Општина Брвеница, каде што има голем пожар во близина на селото, кој се заканува на селото“, рече Ангелов.

— реклама —

Тој посочи дека двата авиони се ангажирани за да помогнат во создавање услови за пожарникарите да можат да навлезат во шумата и да дејствуваат на пожарот.

Ангелов информираше и за пожарот во месноста Рамно на Скопска Црна Гора, на територијата на Општина Чучер-Сандево, кој веќе два дена се обидуваат да го стават под контрола. Силниот ветер дополнително ја отежнува ситуацијата, а чадот се движи во правец на Скопје.

— реклама —

Поради тоа, граѓаните во делови од Скопје го чувствуваат мирисот на чад кој, како што објасни Ангелов, доаѓа токму од пожарот кај Рамно.

Во гаснењето учествува полициски хеликоптер, скопските пожарникари, тимови на Дирекцијата за заштита и спасување со возила „Пинцгауер“, како и околу 30 припадници на Армијата. Нивната задача е да спречат ширење на огнот и негово преминување преку патот.

Според Ангелов, теренот е исклучително стрмен и се наоѓа на над 1.600 метри надморска височина, а длабокиот дол и густиот чад го прават директното гаснење премногу ризично. Тој нагласи дека безбедноста на пожарникарите и граѓаните е на прво место.

— реклама —

„Премногу е ризично. Има премногу чад што не дозволува луѓе да работат таму. Може некој да се задуши, да настрада и моето основно начело – безбедноста на граѓаните, но и на пожарникарите, секогаш на прво место“, рече Ангелов.

Тој очекува во текот на вечерта да биде намален пожарот на кракот што се движи кон Скопје, додека гаснењето на деловите што се движат кон долот ќе продолжи внимателно во текот на ноќта.

Ангелов процени дека во текот на денот на територијата на државата имало најмалку 30 пожари на отворен простор и апелираше до граѓаните да бидат особено внимателни.

„Доволно е само една искра за вистинска катастрофа“, предупреди тој.