Вицепремиерот Кочо Анѓушев негираше дека влијаел за одлуката на Владата да се врати рамниот данок како во времето кога ВМРО ДПМНЕ беше на власт, а да се замрзне прогресивното оданочување на персоналниот данок на доход што беше клучно предизборно ветување на СДСМ.
Одговарајќи на прашање на Алсат М дали тој го убедил премиерот Зоран Заев да го врати рамниот данок и дали со тоа штити бизнис интереси, Анѓушев рече дека одлуката потекнува од Министерството за финансии.
„Министерството за финансии ги правеше анализите, јас истите ги видов на владина седница кога тие беа разгледувани. Немав никакво влијание во делот на носењето на оваа одлука“, изјави Анѓушев.
Тој одби да ги коментира критиките на поранешниот министер за финансии, Драган Тевдовски, и неговиот тогашен советник, Бранимин Јовановиќ, кои ја воведоа прогресивната даночна стапка.
