Апелациониот суд Скопје ги одби како неосновани жалбите на обвинетите во предметот познат во јавноста како „Групата од Грчец“, а ја уважи жалбата на Основното јавно обвинителство за гонење организиран криминал и корупција, со што ги преиначи казните изречени во првостепената пресуда.
Како што соопшти Судот, по одржаната јавна седница, разгледувањето на списите, жалбите, предлогот на Вишото јавно обвинителство и усните наводи на странките, на 10 јули годинава донел пресуда со која ги одбил жалбите на обвинетите Ф.Б., С.А., Н.И., Б.А., Ф.С. и Ш.С.
Истовремено, Апелација ја уважила жалбата на Обвинителството и ја преиначила пресудата на Основниот кривичен суд Скопје од 15 јули 2025 година во делот што се однесува на кривичните санкции, односно висината на изречените казни.
Во останатиот дел првостепената пресуда е потврдена, вклучително и одлуките со кои обвинетите беа огласени за виновни за кривични дела поврзани со неовластено производство и пуштање во промет на наркотични дроги, злосторничко здружување и убиство.
Од Апелациониот суд посочуваат дека поради обемниот доказен материјал и сложеноста на предметот, во тек е писмената изработка на пресудата.
„Јавноста дополнително ќе биде известена за објавата на одлуката на Апелациониот суд Скопје по конкретниот предмет, која ќе биде достапна во целост на веб-страницата на судот, согласно Законот за судовите и Законот за управување со движењето на предметите во судовите“, соопшти Апелациониот суд Скопје.
