Апелациониот суд Скопје ја донесе правосилната одлука за предметот познат како „Хотел Изгрев“, со која ја потврди пресудата на Основниот кривичен суд Скопје, а во делот што се однесува на двајца обвинети донесе одбивателна пресуда поради застареност на кривичното гонење.
Од Апелациониот суд информираа дека, постапувајќи по жалбата на Основното јавно обвинителство за гонење организиран криминал и корупција, ја одбиле жалбата како неоснована во делот што се однесува на обвинетиот Д.С. од Скопје, со што ослободителната пресуда за него останува во сила.
Во однос на обвинетите Д.М. и Ѓ.М. од Струга, второстепениот суд ја преиначил првостепената пресуда и донел одбивателна пресуда, бидејќи кривичното гонење не може да продолжи поради настапена застареност, согласно одредбите од Законот за кривичната постапка.
Според Апелациониот суд, постапката за овој предмет започнала во 2009 година, а во периодот до 2025 година биле донесени повеќе различни првостепени пресуди кои, по жалби на странките и одлуки на второстепениот суд, повеќепати биле укинувани и враќани на повторно судење.
Со најновата одлука на Апелациониот суд Скопје, предметот „Хотел Изгрев“ правосилно е завршен.
