Рускиот претседател Владимир Путин влегува во еден од најтешките периоди од своето 25-годишно владеење, додека незадоволството во рускиот политички и бизнис-елитен круг расте поради војната во Украина, економскиот притисок и сè поизразената изолација на земјата, пишуваат повеќе западни медиуми, повикувајќи се на извори блиски до Кремљ и европски разузнавачки служби.
Во текстот се наведува дека Путин и понатаму е решен да ја продолжи војната во Украина и верува дека руските сили ќе успеат целосно да го освојат Донбас до крајот на годината. Според извори блиски до Кремљ, руски генерали му презентираат оптимистички извештаи и уверуваат дека „победата е блиску“.
„Путин е фиксиран на Донбас и нема да запре пред тоа“, тврди еден од соговорниците.
Сепак, според воени аналитичари, сегашното темпо на руското напредување покажува дека би можеле да бидат потребни години за целосно заземање на регионот.
Во меѓувреме, во Русија расте незадоволството и кај дел од елитите и кај граѓаните. Извори за западните медиуми велат дека сè повеќе луѓе во врвот на системот чувствуваат дека се носат „самоуништувачки одлуки“, а дел од оние кои порано отворено го поддржувале Путин веќе не го прават тоа.
„Се чувствува дека нешто лошо се приближува“, вели добро поврзан руски бизнисмен.
Во текстот се наведува и дека ограничувањата на интернетот, прекините на мобилните мрежи и зголемената контрола врз комуникациите предизвикуваат сериозно незадоволство кај јавноста. Кремљ тоа го оправдува со безбедносни причини и заштита од украински дронови и саботажи.
Руски извори признаваат дека Путин сè повеќе се потпира на безбедносните служби и силовите структури, додека економските проблеми дополнително ја влошуваат атмосферата во земјата.
И покрај шпекулациите за можен преврат или закани од внатрешниот круг, западни аналитичари сметаат дека Путин и натаму цврсто го контролира системот.
„Да, има тензии и несигурност. Но, приказните за непосреден пад на режимот се прерани“, вели извор близок до Кремљ.
Во анализата се наведува и дека Путин ја изгубил вербата дека Доналд Трамп може да изврши доволен притисок врз Киев за територијални отстапки, а Москва сè помалку гледа смисла во преговори со Вашингтон.
Според дел од соговорниците, доколку Русија почувствува слабеење на украинската одбрана, Кремљ би можел да ги прошири амбициите и надвор од Донбас.
„Тој не е долгорочен стратег. Апетитот му расте додека јаде“, вели еден од изворите.
