Компанијата Apple би можела веќе во септември да го претстави својот прв преклопен iPhone, за кој неофицијално се шпекулира дека ќе го носи името „iPhone Ultra“.
Според најновите информации објавени од новинарот Марк Гурман од Bloomberg, технолошкиот гигант најверојатно ќе ја следи својата вообичаена практика и новата генерација на iPhone уреди ќе ја претстави во втората недела од септември.
Гурман наведува дека Apple традиционално ги организира своите презентации во првиот вторник или среда по американскиот празник Labor Day, што годинава би значело дека настанот би можел да се одржи на 9 септември.
Доколку ова сценарио се реализира, преднарачките за новите модели би започнале веќе на 10 септември, додека продажбата би стартувала кон крајот на месецот.
Покрај долгоочекуваниот преклопен модел, Apple се очекува да ги претстави и новите модели iPhone 18 Pro и iPhone 18 Pro Max.
Сепак, заедно со новите уреди пристигнува и помалку добра вест за корисниците. Според неофицијалните информации, Apple би можела повторно да ги зголеми цените, па новата iPhone 18 Pro серија би можела да биде поскапа од актуелните модели.
Засега од Apple нема официјална потврда за датумот на настанот ниту за изгледот и карактеристиките на идниот преклопен iPhone.
