Арагчи со предупредување: „Иран го нападнаа двапати, ако се обидат повторно, резултатот ќе биде ист“

Иранскиот министер за надворешни работи, Абас Арагчи, изјави дека Ормускиот Теснец по војната нема да се врати во состојбата во која бил претходно.

Тој соопшти дека Иран и Оман преговараат за пловните рути и управувањето со теснецот.

— реклама —

„Сите мора да прифатат дека во регионот се случија суштински и стратешки промени и дека ништо повеќе нема да биде како пред четириесетдневната војна, односно Рамазанската војна. Тоа го вклучува и Ормускиот Теснец“, изјави Арагчи.

Тој потсети дека теснецот со децении бил отворен за пловидба.

— реклама —

Според неговите зборови, Иран и Оман, како две крајбрежни држави, не го попречувале преминувањето на бродовите, туку се грижеле за безбедноста и заштитата на животната средина.

— реклама —

„Меѓутоа, сегашната војна промени сè. Мораме да прифатиме дека се создадоа нови реалности. Пловните рути низ Ормускиот Теснец нема да бидат исти како порано. Ниту управувањето со Ормускиот Теснец нема да биде како претходно“, рече иранскиот министер.

Тој додаде дека за овие прашања веќе се разговарало со Оман и дека преговорите ќе продолжат.

Иранскиот министер испрати и предупредување во врска со најавите за нов воен конфликт.

„Ако има барем малку разум, повеќе нема да се обидуваат воено да го нападнат Иран и да извршат агресија врз иранскиот народ. Се обидоа двапати и видоа каков беше резултатот. Ако сакаат да се обидат уште еднаш, и самите знаат дека нема да постигнат поинаков резултат од претходно“, порача Арагчи.