Пожарите во Кочани, Старо Нагоричанe, Малешевијата, Гевгелиско, Скопско ги извадија на површина системските слабости и покажаа дека во изминатите 30 години недоволно се инвестирало во противпожарните служби.
Има проблеми и при спроведувањето на Законот за пожарникарство, а пожарите од големи размери што ја зафатија државата, го отворија и прашањето дали е потребно да се направат законски измени за негово поефикасно спроведување во пракса, како и да се посвети поголемо внимание на формирањето на доброволните противпожарни друштва по примерот на некои соседни држави.
Иако законот налага минимален број на пожарникари во однос на бројот на жители, ретки се општините во кои тоа е запазено. Во најголемиот број на општини, бројот на пожарникари е многу помал во споредба со бројот на жители кои се опслужуваат. Во пракса, законот не се спроведува и во делот каде е наведено дека помалите општини во кои нема противпожарни служби треба да исплаќаат одреден финансиски надомест за пожарникарските интервенции.
Истражувањето на Центарот за граѓански комуникации покажа дека на државата и недостигаат над 500 пожарникари. Во најголем дел од општините, бројот на пожарникари е под законски утврдениот минимум, а во оние општини кои го задоволуваат минималниот број, противпожарните служби велат дека не е на одмет да имаат повеќе вработени.
Во Законот за пожарникарство точно е пропишано колкав треба да биде минималниот број на пожарникари во однос на бројот на жители, но во реалноста, ситуацијата е поинаква. На Територијалната противпожарна единица на Град Скопје и недостигаат околу 200 пожарникари за да го задоволи законски пропишаниот минимум, а во Кочани, кој на почетокот на неделава го зафати пожар од досега невидени размери, има 17 пожарникари што е речиси двојно помалку од законски утврдениот минимум, имајќи предвид дека оваа противпожарна служба ги опслужува и општините Зрновце и Чешиново-Облешево.
