Мираковска до Јорданов: Имате бугарски пасоши на македонски граѓани регистрирани на една бандера во град во Бугарија, тоа е ваш проблем
Пратеничката Соња Мираковска денеска на својот бугарски колега Александар Јорданов во Европскиот парламент му порача дека таа е Македонка и зборува на македонски јазик, а не на погрешен јазик.
„Јас сум Македонка, зборувам на македонски јазик и живеам во Македонија, сега наречена Северна Македонија. Тоа е мојот идентитет“, порача таа.
Според неа, потребно взаемно разбирање и почитување.
Таа вели дека Бугарија не може да им кажува на македонските граѓани дека тие зборуваат погрешен јазик.
„Поради нашето долго чекање за членство во ЕУ се појави проблем, а тоа е земањето бугарски пасоши. Прво беше тоа да се купи џип и да се оди во Европа. Вие имате бугарски пасоши на македонски граѓани регистрирани на една бандера во град во Бугарија. Тие пасоши се на нелегален начин дадени и тоа треба да се истражува, тоа е ваш проблем“ рече Мираковска и повика луѓето да се погледнат во очи и да си подадат рака во кризата која ни претстои.
Таа додаде дека кризата е тешка за нас како мала земја.
„Но ние сме навикнати на тешки услови. Кризата ќе биде потешка за другите, кои се навикнати поубаво да живеат. Ние долго време тешко минуваме и нашите граѓани минуваат тежок пат. Кога сте така научени, полесно ги минувате кризите. Но да се освестиме и да бидеме луѓе меѓу себе, за да можеме да се движиме по патот“ рече Мираковска.
