(Фото) Се појави Заев, до него и Спасовски, застанати до Пендаровски

По подолго време, експремиерот и експретседател на СДСМ, Зоран Заев, се појави во јавност. Во пресрет на претседателската кампања, тој застана до претседателскиот кандидат, Стево Пендаровски. Доби и јавна благодарност, но не од Пендаровски, туку од министерот Љупчо Николовски кој при обраќање за браната „Конско“ ги редеше сите кои допридонеле во капиталната инвестиција. Истовремено, таму се појави и ексминистерот за внатрешни работи, Оливер Спасовски, кој сега нема никаква функција. Пендаровски, во неговата објава, не спомена ниту едно од овие имиња.

— реклама —

„Ја поздравувам изградбата на браната „Конско“ како дел од Хидромелиоративниот систем Гевгелиско поле, една од најсериозните инвестиции во македонското земјоделие, но, и на енергетски план, имајќи предвид дека транспортирањето на водата за наводнување може да се користи и за производство на електрична енергија.

— реклама —

Со оваа капитална инвестиција граѓаните на Гевгелија ќе имаат редовно снабдување со квалитетна, чиста и здрава вода за пиење, а плодниот македонски југ, гевгелиското поле, ќе има можност за пристап до дополнителни сериозни количини на вода за наводнување што е предуслов за подобар принос на земјоделските култури.

— реклама —

Верувам дека со најголемата инвестиција во последните децении во гевгелискиот крај повторно се враќа фокусот кон земјоделието и развојот на нашиот јужен регион. Очекувам дека вакви и слични проекти ќе следат и во останатите делови од земјата каде што недостасуваат акумулации како поддршка на земјоделското производство“, напиша Стево Пендаровски на „Фејсбук“.

Настанот беше организиран од СДСМ по повод завршување на изградбата на браната.