Нема повредени лица, а дојавата за пожарот во скопската Противпожарна бригада пристигнала во 9:50 минути. Ова го изјави Звонко Томевски, командант на Противпожарната бригада на Град Скопје. Тој посочи дека температурата била висока, како внатре, така и на околните објекти. Граѓани кои живеат во близина кажале дека им се растопиле и ролетните.
„Во 9 часот и 50 минути е примена пријава за пожар во Универзалната сала. Пратени се две возила од Тафталиџе, кои уште при доаѓањето забележаа висок чад и побараа помош. Интервениравме со девет противпожарни возила, со 24 пожарникари. Благодарение на пожртвуваноста на колегите, за брзо пожарот беше ставен под контрола. Имавме висока температура во самиот објект, сакам да се заблагодарам и на полициските службеници кои ни овозможија побрзо да пристигнеме, како и на Водовод кои се потрурдија континуирано да нѐ снабдуваат со вода за интервенцијата да биде поуспешна, рече Звонко Томевски, командант на Противпожарната бригада на Град Скопје.
Тој додаде дека штетата не може да се констатира сега.
„Настана колапс на кровната конструкција, се работи на догаснување, не може да се пристапи до сите места внатре оти има високи температури се уште внатре“, додаде Томевски.
За проблемите со хидрантите во Скопје, Томевски вели: „Никогаш не се потпираме на нив, секогаш носиме вода“.
