Дванаесет лица кои патувале со летот на „Катар ервејс“ од Доха за Ирска се повредени за време на турбуленции, соопшти денеска аеродромот во Даблин, додавајќи дека авионот слетал безбедно и според распоредот.
Авионот Боинг 787 Дримлајнер го заврши летот QR017 непосредно пред 12 часот по локално време, соопштија од аеродромот.
„По слетувањето, авионот го пречекаа службите за итни случаи на аеродромот во Даблин, односно вработени во полицијата, противпожарната и спасувачката служба. Шест патници и шест членови на екипажот пријавиле повреди откако авионот поминал низ турбуленции додека летал над Турција“, се вели во соопштението. .
Ирската телевизија RTE, повикувајќи се на патници кои пристигнуваат на аеродромот, соопшти дека инцидентот траел помалку од 20 секунди и се случил за време на услугата за храна и пијалоци.
Катар ервејс не одговори веднаш на барањето за коментар.
Инцидентот се случи пет дена откако авион на Сингапур ерлајнс на летот од Лондон до Сингапур принудно слета во Бангкок поради силни турбуленции, при што загина 73-годишен Британец, а 20 беа на интензивна нега.
Авионските несреќи поврзани со турбуленции се најчестиот тип, според студијата од 2021 година на Националниот одбор за безбедност на транспортот на САД.
Од 2009 до 2018 година, американската агенција откри дека турбуленциите сочинуваат повеќе од една третина од пријавените авионски несреќи и дека повеќето резултирале со една или повеќе сериозни повреди, но без оштетување на авионот.
