Ефективно украинско заглавување на комуникациите им зададе сериозен удар на Русите при нивната употреба на прецизно наведувани крстосувачки бомби. Со заглавување на сигналите помеѓу бомбите и сателитите за наведување, бомбите се повеќе ги промашуваат своите цели.
Но, се чини дека ова мешање не допира длабоко во руска територија. Токму поради тоа руски борбен авион во вторникот, или непосредно пред тоа, успеа точно да удри во брана недалеку од украинските позиции во регионот Белгород во западна Русија, пишува Форбс.
Станува збор за брана што го спречува течението на реката кај Поповка, погранична населба во Белгород. Откако нивните линии за снабдување беа прекинати во февруари, украинските сили ја напуштија соседната Курска област и започнаа неколкунеделна плитка турканица во Белгород.
Во моментов борбите главно се водат околу Поповка и блиската Демидовка, а според ситуацијата на крајот на март и двете беа под претежно украинска контрола. Но, според Украинскиот центар за одбранбени стратегии, руските трупи повторно започнале контранапад и повторно влегле во Демидовка до среда. Украинското воено воздухопловство обезбедува поддршка со борбени авиони Су-27, кои главно ги таргетираат мостовите преку кои руските сили носат засилување.
Но, руските воздушни напади не престанаа. Во вторникот нападот беше извршен со нов модел на бомбата ОДАБ-500, прецизно водена термобарична бомба која растура запалива материја во форма на аеросол и потоа ја активира. „Руските воздухопловни сили помагаат да се одбие непријателската офанзива со воздушни напади со бомби ОДАБ, уништувајќи ги приодите кон Поповка“, се пофали еден руски блогер.
