Врховниот суд ја укина тригодишната казна на возачот Васил Јованов, кој беше осуден за трговија со дрога. Оттаму без многу детали, но посочуваат дека одлуката ја донеле откако жалба поднел адвокатот на Јованов. Па така, сега предметот одново е во рацете на Апелација, а откако условната осуда која ја изрече Кривичен, тие ја преиначија во затворска казна.
Одлуката е донесена на 7 мај, односно една недела пред Јованов да биде осуден и за прегазувањето на Фросина Кулакова на пешачки премин кај Универзална сала. На рочиштето каде тој доби 12 години затвор за ова дело, ниту адвокатот, ниту судијката знаеше за оваа одлука. Напротив, изречената казна за дрогата беше ценета како отежителна околност.
До овој момент, не успеавме да ја најдеме писмено изработената одлука на Врховниот суд во која ќе треба да се наведени причините за укинувањето.
