Уште еднаш потврди зошто важи за еден од најдобрите фудбалери во историјата. Лионел Меси постигна хет-трик во победата на Аргентина над Алжир од 3:0 и го израмни рекордот на Мирослав Клозе по бројот на голови на светските првенства.
Аргентина успешно ја започна одбраната на титулата на Мундијалот што се одржува во САД, Канада и Мексико, а во прв план беше токму 38-годишниот капитен. Неговиот трет погодок на натпреварот беше вкупно 16. на светските првенства, бројка до која претходно стигна само легендарниот германски напаѓач Мирослав Клозе.
Дополнителна симболика има фактот што рекордниот гол дојде точно 20 години по првиот погодок на Меси на мундијалската сцена.
„Да уживам во ова со моето семејство, моите соиграчи и со луѓето кои секогаш се покрај мене е навистина прекрасно. Се чувствувам добро. Благодарен сум на навивачите, бидејќи уште еднаш покажаа колку Аргентина живее за фудбалот. Повторно го наполнивме стадионот“, изјави Меси по натпреварот.
Покрај новото историско достигнување, аргентинската ѕвезда го одигра и својот 200. натпревар во националниот дрес, станувајќи првиот фудбалер што настапил на шест светски првенства.
Меси, воедно, стана и највозрасниот играч кој постигнал хет-трик на Светско првенство, додавајќи уште едно рекордно достигнување во својата богата кариера.
Шанса за ново испишување историја ќе има веќе во следното коло, кога Аргентина ќе се соочи со Австрија. Доколку повторно се запише во листата на стрелците, Меси самостојно ќе го преземе врвот на вечната листа на голгетери на светските првенства.
