Српскиот кошаркар Алекса Аврамовиќ ја сумираше сезоната по освојувањето на шампионската титула во АБА лигата со Дубаи БЦ, истакнувајќи дека успехот има посебно значење бидејќи станува збор за првиот трофеј во историјата на клубот.
Во разговор за српските медиуми, Аврамовиќ нагласи дека е горд што бил дел од тимот кој испишал нова страница во историјата на клубот.
„Многу сум среќен поради првата титула со Дубаи, бидејќи создадовме историја за еден нов клуб кој има потенцијал да стане гигант во европската кошарка. Организацијата се развива, има многу позитивни работи, но и сегменти на кои треба дополнително да се работи. Амбициите се највисоки и мислам дека следната сезона целта ќе биде пласман на завршниот турнир во Евролигата“, изјави Аврамовиќ.
Тој се осврна и на предизвиците со кои се соочувал во текот на сезоната, посочувајќи дека во изминатиот период претрпел дури пет повреди.
„Сезоната беше исклучително напорна. Имав проблеми со повреди, бев надвор од терените на почетокот, потоа се вратив, па скршив ребро. Имаше и многу патувања и промени во секојдневниот живот. Сепак, трофејот е круна на целата сезона“, рече тој.
На прашањето кого би го ангажирал доколку бил на функцијата спортски директор, Аврамовиќ без двоумење го посочи својот репрезентативен колега Богдан Богдановиќ.
„Би го довел Богдан Богдановиќ“, кратко одговори кошаркарот.
Аврамовиќ откри и дека во текот на летото ќе мора да се подложи на хируршка интервенција за корекција на девијација на носната преграда, проблем што, како што вели, го мачи веќе неколку години.
Покрај кошарката, тој внимателно го следи и Светското фудбалско првенство, а негов фаворит е репрезентацијата на Аргентина.
„Навивам за Аргентина и за Меси, бидејќи сметам дека е најдобриот фудбалер на сите времиња. Дополнително, мојот брат е оженет со Аргентинка, па имаме и семејна причина да ја поддржуваме Аргентина“, изјави Аврамовиќ.
